S'schmöckt wieder nach Läbä

Nur no das Tunnel womi vum Süde trennt
Äs paar Kurven irgendwo im dunkle Fels
Ghör s'Stampfe vu dä Loki als Echo vu dä Wänd
Ha bestimmt d'Helfti vergässä aber was sells
Irgendwo churz nach em Gotthard fangt s'Läbän a
Und das Gfühl, wo di letschte Fessle sprengt
S'Chnurre i mim Buuch seit mir, dass ich riesig Hunger ha
Uf Sunne, Pizza, Pasta und Glacéständ

S'schmöckt wieder nach Läbä
Nach Meer und nach Fisch
Nüt schiint meh vergäbä
D'Summerbrise isch frisch
S'schmöckt wieder nach Läbä
Und was z'Bruch ggangen isch
Hani alls chönne chläbä
Ich mach reine Tisch

Än chliinä Schritt für än Mensch aber än ganz grosse für d'Welt
Äso hät dä Armstrong damals gseit
Ich tuusch bloss äs paar Franke gägä Eurogeld
Und gspür wie mich dä Vollmond südwärts treit
Mit sinrä sunnehelle Sehnsucht weckt er i mir dä Durscht
Und ich ha Gluscht uf ä süessi Summerfrucht
Bier und Schwyzerbradwürscht die sind mer jetzte wurscht
Schlürf nur no Prosecco oder di schuumig Brandig vo dä Bucht