Was für än Tag, was für äs Läbä!

S'isch 10ni und ich ligg immer no im Bett
Lueg durs Fenschter, gseh: s'wird än schöne Tag
Ich sett ufstoh, doch im Bett isch's no so nett
Und ich merk, dass i no lang nöd ufstoh mag
Und dänn los i nu chli Musig, bis am 12i oder so
Reis mit alte Lieder dur d'Vergangeheit
Und früehstens gägän 1s schaff ich's mis Bett z'verloh
I mir drin, die Stimm, wo zue mer seit:

Was für än Tag, was für es Läbä
Mir lauft d'Zyt dur d'Händ wien äs Schloss us Sand
Wecker hin, Wecker här – alls schiint vergäbä
Min Chopf voll Vorsätz lauft vorsätzlich gäg d'Wand

Und statt jetzt endlich – endlich! – fürschi z'mache
Hock i bloss do, stiere Söifeblotere i d'Luft
Und s'Gschirr, d'Wösch und die andre tuusig Sache
Schmöcket lengscht nöd so wie dä Summerduft
Und s'Schriibzüüg i dä Händ kämpf i wien än Leu,
Dass's au dä Tag no zu öppis bringt
Schiint mer alles ururalt und trotzdem numal neu
Jetzt wo dä Sinn um sis Dasii ringt