Marcel Schmuki






D'Nase

Mini Nase tüech en scho chli lang het dr einti zue mer gseit
Nei, er fänd sie ehnder z'churz meint do druf dä zweit
Zwiit rächts zwiit links sie striited sich do chunnt au scho dä dritti
Und findt sie seigi eidüütig vil z'fescht i dä Mitti


Refrain:
Und so triff i alli naselang
Än Nasespezialischt
Wo mich vu links nach rechts vermisst
Und weiss, was für mich s'Beschtän isch

Das wär jo alles halb so schlimm ich liesst mini Nase chürze
Verlängere, versetze oder mit Marzipan würze
Wänni dademit numä chönnt mini Kritiker umschwärme
Aber chuum git dr einti Rueh fangt der ander scho a lärme

Refrain:
Will ich triffen alli naselang
Än Nasespezialischt
Wo mer sini Diagnose stellt
Und weiss, was für mich s'Beschtän isch

Tatsächlich han i scho fascht alli Nasen aprobiert
Pinochio und Donald Duck sie alli händ mi inspiriert
Han chlini Schnäbel und au scho mal än grossä Rüssel gha
Erreicht hani demit nur eis: me het sich gstossä dra

Refrain:
Will ich triffen alli naselang
Än Nasespezialischt
Wo mer sini Medizin verschriibt
Und weiss, was für mich s'Beschtän isch

Z'letscht häts mer glangt ich ha d'Nase gstrichä vollä gha
Vu Naseweis und Kompanie und dem ganze Trallala
Und zum Schluss bliibt nur no ein, wo mi würklich fasziniert
Will er d'Welt mit sim fesche Zingge so ungeniert parodiert

Refrain:
Er hät ä roti Nase
Und gseht luschtig-truurig us
Und er cha luege so viel er wott
Er gseht nöd drüberus