Marcel Schmuki






Ä schrägi Sach

S'Läbän isch ä schrägi Sach
Alls verwinklet, nüt im Lot
S'hebt grad so mit Ach und Krach
Äs alts Huus, wo scho ewigs stoht
Überall isch dä Wurm drin
Und frisst mit Appetit
D'Bälke händ no immerhin
Aber s'chnorzt bi jedem Schritt

S'Läbän isch ä schrägi Sach
Alles gwagglig, alls marod
Kaputti Ziegel uf äm Dach
Wo's Rägäwätter duräloht
Sicher nöd für d'Sintfluet baut
Und au nöd für d'Ewigkeit
Mit tüüfe Cheller, wo sich s'Wasser staut
I dä schwarze Dunkelheit

S'Läbän isch ä schrägi Sach
Än schiefen, alte Kahn
Wo mit brochnem Bug im Bett vum Bach
Träumt, äs seig dä Ozean
Wo härt am Wind immer erscht zum Schluss
Än grade Kurs iischloht
Sich triibä loht im grosse Fluss
Und nöd wüsse will wie's wiitergoht

S'Läbän isch ä schrägi Sach
Vil z'quadratisch, gar nüt rund
Ä miesi Partie Computerschach
Wot als gschlagne Lumpehund
Än Buur verlüürsch, än Turm verbocksch
Und näbebii no d'Dam verspilsch
Bist einsam uf äm König hocksch
Und matt di letschti Hoffnig killsch

S'Läbän isch ä schrägi Sach
Wot nie sicher bisch, dass's langt
Än Drahtseilakt im Zirkusdach
Wo alls am Silberfade hangt
Än luftige Balanceakt
Än Trapezsprung is Jetzt
Mit Trummelwirbel vor äm Takt
Bevor's di obenabe schletzt.

S'Läbän isch ä schrägi Sach
Und immer wieder fahrts der ii
Doch für ein, zwei Träum unter Dach und Fach
Isch's no immer z'gwünne gsi.