Marcel Schmuki





Ich warte

Ich warte
Uf än Brief vu ihrä
Und unterdesse schickt mir die halbi Wält Poscht
D'Bank wägäm Konto, s'Stüüramt wäg dä Stüürä und d'Gmeind wägäm Komposcht

Ich warte
D'Rächnige vum Zahnarzt attackieret mis Ersparte
Und i mim Zimmer tüürmet sich d'Werbeprospekt
Und dass sie mir immer nunig schriibt tüecht mi langsam liecht suspekt

Ich warte
Und bin langsam so liecht am durästarte
Än A-Poscht bruucht 1 Tag, 1+1 git meinti zwei
Ich sortier di ganzi Poscht
Aber au hüt isch wieder “nei”

Ich warte
Bis i Wurzle schlo wien än Gartezwärg im Garte
Und glaub ich han i däm Spiel ganz schlechti Charte
Ich schick d'Stüürrechnig ab, bin lengschtens blank und stier
Und langsam aber sicher wird mini Hoffnig Altpapier.